Á­kvarðanir teknar af heift en ekki skyn­semi

Stjórn Hafnasjóðs Norðurþings var afgerandi í ályktun sem samþykkt var í morgun en þar segir meðal annars: „Á árunum 2015–2020 voru teknar ákveðnar stjórnvaldsákvarðanir af þáverandi ráðamönnum Norðurþings sem eldast afar illa. Þessar ákvarðanir voru teknar af meiri heift en skynsemi og það eru þessar ákvarðanir sem eru á gjalddaga núna og við sitjum uppi með það.“

Þetta kemur fram í frétt sem Örlygur Hnefill ritstjóri Húsavíkur ritar. Þar segir enn fremur að hafnarsjóður sé í samtali við fyrirtæki sem stunda hvalaskoðun frá Húsavík og að unnið sé að því að finna lausn á málinu. „Við erum í samtali við félögin sem stunda hvalaskoðun frá Húsavík og erum að reyna að leysa úr stöðunni og vonandi náum við einhverri lausn í málinu þar sem hvalaskoðunartímabilið er að hefjast.“

Um er að ræða kröfu Gentle Giants á hendur sjóðnum sem nemur rúmum 90 milljónum króna. Landsréttur komst að þeirri niðurstöðu að Hafnasjóður hefði ekki haft heimild til að innheimta farþegagjald með þeim hætti sem gert var. Hæstiréttur hafnaði beiðni Hafnasjóðs Norðurþings um áfrýjunarleyfi og því stendur dómur Landsréttar óhaggaður.

Í ályktuninni segir mikilvægt að sátt náist í málinu en Stefán segir að búið sé að greiða sextíu prósent upphæðarinnar sem honum voru dæmdar. Hann segir alls kyns óhæfuverk hafa verið unnin og þar hafi farið fremstir í flokki fyrrverandi sveitarstjóri, skipulagsfulltrúi og lögmaður Norðurþings.

Fyrrverandi sveitarstjóri er Kristján Þór Magnússon, sem að sögn Stefáns hjólaði í Gentle Giants af mikilli ósanngirni verandi náskyldur helstu keppinautum, sem er Norðursigling, auk þess sem hann hafi verið fyrrverandi starfsmaður fyrirtækisins. Gentle Giants og Norðursigling hafa eldað grátt silfur í aldarfjórðung.