Fyrrum heims­meistari í tveggja ára bann fyrir „felu­leik“

Dómstóll komst að þeirri niðurstöðu að Kerley hefði sýnt af sér vanrækslu og gáleysi með því að fylgja ekki reglum um lyfjaeftirlit eftir að Bandaríkjamaðurinn var skráður með þrjú brot á slíkri dvalarstaðaskráningu á tímabilinu 11. maí til 6. desember 2024.

Kerley var settur í bráðabirgðabann af Siðanefnd alþjóðafrjálsíþróttasambandsins (AIU) í ágúst á síðasta ári og missti því af heimsmeistaramótinu í Tókýó í september.

Keppnisbann hins þrítuga Kerley gildir til 11. ágúst 2027 og keppnisárangur hans á tímabilinu 6. desember 2024 til 12. ágúst 2025 hefur verið ógiltur, þar með talin verðlaunafé, öll verðlaun og allir titlar.

Kerley varð heimsmeistari í 100 metra hlaupi árið 2022 og hefur unnið tvenn verðlaun á Ólympíuleikum.

Kerley hefur einnig verið gert að greiða Alþjóðafrjálsíþróttasambandinu þrjú þúsund pund í lögfræðikostnað og önnur útgjöld en það eru meira en fimm hundruð þúsund í íslenskum krónum.

Í alþjóðalyfjareglunum kemur fram að íþróttamaður megi ekki missa af þremur lyfjaprófum og/eða skráningarbrotum innan tólf mánaða tímabils.

Siðanefndin sagði að áfrýjunardómstóll hefði ekki tekið til greina fjórða meinta brot Kerley á dvalarstaðaskráningu þann 7. desember, þar sem þegar hefði verið komist að þeirri niðurstöðu að hann hefði framið brot á grundvelli fyrstu þriggja.

Skömmu eftir að bannið var tilkynnt birti Kerley fjölda færslna á samfélagsmiðlum. Í einni þeirra var mynd af honum þar sem hann ryðst í gegnum fylkingu manna klæddra eins og herlögreglumenn í búningum merktum „AIU“, „WADA“ (Alþjóðalyfjaeftirlitið) og „USADA“ (Bandaríska lyfjaeftirlitið).

„Ég er orðinn þreyttur á að halda öllu inni,“ stóð þar. „Þið getið ekki stjórnað mér og sannleikurinn er háværari en þögnin.“

Í annarri færslu, sem gæti hafa verið vísun í lyfjaeftirlitsmennina sem komu á einum þeirra daga sem hann missti af prófi, stóð: „Eitthvert tilviljanakennt númer frá Mexíkó sem leit út eins og svikasímtal og það er ætlast til að ég svari því? Ég bý í Bandaríkjunum, af hverju er númer frá Mexíkó að hringja í símann minn?“ skrifaði Kerley.