Gæti misst af titilvörninni

McIlroy á titil að verja á Players-mótinu en koma hans á Sawgrass-völlinn, þar sem mótið fer fram, dregst vegna meiðslanna. Hann vonast þó til að taka þátt.

Flestir keppendur eru mættir á staðinn en McIlroy segist enn vera að glíma við bakmeiðsl sem tóku sig upp um helgina. Hann stefni á að mæta á Sawgrass á miðvikudag.

Hann var á fjórum undir pari fyrir hringi helgarinnar á Palmer-mótinu en dró sig úr keppni aðeins hálftíma fyrir upphafshöggið á laugardaginn var. Það er aðeins í þriðja sinn á löngum ferli McIlroy sem hann dregur sig úr keppni vegna meiðsla.

„Ég fann verk í bakinu í upphitun og þegar ég fór að slá bolta versnaði ástandið og ég fékk ítrekaða krampa í bakið,“ sagði McIlroy um helgina.

McIlroy vonast hins vegar til að verja titilinn og vinna hann í þriðja sinn, eftir að hafa áður unnið Players-mótið 2019. Hann myndi með því jafna Jack Nicklaus sem er sá eini sem hefur unnið mótið þrisvar.

Meiðslin koma ekki upp á besta tíma en það styttist í að risamótin fari af stað. McIlroy fagnaði sigri á Masters-mótinu á Augusta National-vellinum í fyrsta sinn í fyrra en Masters-mótið fer fram eftir sléttan mánuð.