Atli Sigur­jóns skoraði fimm mörk og fór illa með Val

Umræddur leikur hafði verið mikið á milli tannanna á fólki en Valsarar mættu ekki til leiks með sinn sterkasta hóps, sama hver ástæðan þar kann að vera en það voru piltarnir af Hlíðarenda sem komust yfir í leiknum.

Kristján Oddur Kristjánsson skoraði fyrsta mark leiksins á 15.mínútu og gestirnir komnir einu marki yfir. 

Atli Sigurjónsson jafnaði metin fyrir Þór Akureyri á 28.mínútu og segja má að hann hafi í kjölfarið tekið yfir leikinn. 

Atli, sem gekk aftur í raðir uppeldisfélagsins og kom frá KR eftir síðasta tímabil skoraði nefnilegast næstu fjögur mörk leiksins, tryggði Þór Akureyri 5-1 sigur og sæti í undanúrslitum Lengjubikarsins. 

Þórsarar enda á toppi riðils tvö með tíu stig. Liðið vann þrjá leiki í riðlinum og eitt jafntefli, fer taplaust í undanúrslitin. 

Valsmenn enda hins vegar í 3.sæti riðilsins með sex stig, tvo sigra og tvö töp.