Spá líka vaxta­hækkun en enn meiri verð­bólgu

„Hærra eldsneytisverð, sem rekja má til átakanna í Mið-Austurlöndum, skýrir að stærstum hluta þá hækkun verðbólgu á milli mánaða sem við spáum. Óljóst er hversu lengi átökin munu standa yfir og hversu langvinn áhrifin á verðbólgu hér á landi verða. Mikið er undir verðbólgumælingum næstu mánaða en forsendur í kjarasamingum á almennum vinnumarkaði byggja á að verðbólga mælist undir 4,7 prósentum í ágúst, eða að hún mælist að meðaltali undir 4,4 prósentum sex mánuði þar á undan. Auknar líkur eru á því að þær forsendur haldi ekki,“ segir í pistli á vef Landsbankans.

Kollegar hagfræðinga Landsbankans í Íslandsbanka spá því að verðbólga aukist í 5,3 prósent og að stýrivextir verði hækkaðir.

Peningastefnunefnd Seðlabankans kemur saman í næstu viku og kynnir vaxtaákvörðun miðvikudaginn 18. mars. Nefndin hélt vöxtum óbreyttum við síðustu ákvörðun og standa þeir nú í 7,25 prósentum.

Í öðrum pistli á vef Landsbankans segir að greiningardeild bankans spái sömuleiðis vaxtahækkun.

„Sviptingar á alþjóðamörkuðum, þá helst hækkun olíuverðs vegna stríðsátaka í Mið-Austurlöndum, hafa þó aukið verðbólguþrýsting og sérstaklega verðbólguvæntingar og við teljum líklegt að peningastefnunefnd horfi sérstaklega til þess við næstu ákvörðun og hækki því vexti.“