Breytti að­eins til og bætti heims­metið í fimm­tánda sinn

Armand „Mondo“ Duplantis mætti skiljanlega fullur sjálfstrausts á Mondo Classic mótið sem hann hélt í Uppsala í Svíþjóð.

Hann trekkti áhorfendur í gang með því að spyrja hvort þau væru til í nýtt heimsmet og sagði síðan frá því að hann hefði breytt áhlaupi sínu.

Duplantis tók 22 skref fyrir stökkin í dag, frekar en sín hefðbundnu 20 skref.

Samkeppnin var vissulega sterk og sex stökkvarar náðu yfir sex metrana, en Duplantis á sér engan líkan og skildi keppinautana eftir. Hann var sá eini sem náði að stökkva yfir 6.08 metra og ákvað þá að hækka stöngina upp í 6.31 metra.

Stökkið heppnaðist og þessi ótrúlegi íþróttamaður bætti þar með heimsmetið í fimmtánda sinn á ferlinum.

„Alltaf þegar ég fer út á völl, þá er ég ykkar fulltrúi. Ég geri það með miklu stolti og ef ég á að vera alveg hreinskilinn. Þetta er mitt hús hérna. Það er alltaf erfitt að vinna mig, en ef þú mætir mér í Svíþjóð, þá er það enn erfiðara,“ sagði Duplantis þegar nýtt heimsmet var í höfn.