„Var bara skemmti­legt og það voru allir að hafa gaman“

„Risastór, geggjað að ná þessum sigri“ sagði Veigar Páll Alexandersson eftir sigurinn í kvöld.

„Við spiluðum mjög vel, Rúnar [Ingi Erlingsson] setur upp gott varnarplan og okkur tekst að gera þetta þokkalega vel og ég held að það hafi skilað þessum sigri“

Njarðvíkingar voru að hitta mjög vel í kvöld en þeir settu 18 þriggja stiga körfur í kvöld og voru að skjóta 54% fyrir aftan þriggja stiga línuna.

„Algjörlega, gaman að sjá Sven [Smajlagic] komast aðeins í gang og ég þarna aðeins í fyrri. Þetta var bara geggjað“

Rúnar Ingi Erlingsson þjálfari Njarðvíkinga sagði eftir síðasta leik að hans menn gætu nú mætt til leiks með minni hræðslu og meiri spennu eftir að það var ljóst að falldraugurinn væri ekki lengur til staðar.

„Menn voru bara aðeins léttari og menn gátu andað aðeins léttar eftir síðustu umferð. Þetta var bara geggjað skemmtilegt og það voru allir að hafa gaman og bara snilld að ná þessum sigri“

Þessi sigur gefur Njarðvíkurliðinu helling fyrir framhaldið.

„Hann gefur okkur mikið. Við erum bara tilbúnir í þessa næstu tvo leiki og ætlum okkur í úrslitakeppnina“

Stuðningurinn sem Njarðvík fékk í kvöld úr stúkunni var gríðarlega góður og mátti sjá þetta skila sér inn á völlinn.

„Það er bara allt. Það er einn leikur í Þorlákshöfn, ég vona að flestir mæti á þá og svo er leikur á móti Keflavík þar sem við ætlum að fylla þessa stúku“ sagði Veigar Páll Alexandersson.