Sósíal­istinn Grégoire nýr borgar­stjóri Parísar

Þjóðfylkingin náði meirihluta í Carcassonne og Éric Ciotti, bandamaður Marine Le Pen, hafði sigur í Nice.

„Verkefnin eru mörg og við byrjum á morgun,“ sagði Grégoire í gær. Á forgangslistanum væru meðal annars málefni barna og heimilislausra.

Grégoire er talinn hafa fengið um það bil 52 prósent atkvæða og hafði þannig betur en hægrimaðurinn Rachida Dati. Grégoire hafði varað við því að Dati myndi gera París að „trumpískri tilraunastofu“ um samvinnu hægri og öfgahægrisins.

Eftir sigurinn í gær sagði hann að París yrði fremst í flokki í baráttunni gegn öfga hægrinu fyrir forsetakosningarnar á næsta ári.

Grégoire tekur við stöðunni af Anne Hidalgo sem hefur gegnt embætti borgarstjóra Parísar frá 2014.