Sturla opnar sig: „Mér finnst ég hafa fundið sjálfan mig aftur“

Sturla Holm Lægreid er kominn aftur í sitt besta form eftir krefjandi vetur og storminn sem viðtalið fræga bjó til á Ólympíuleikunum.

Þetta hefur verið viðburðaríkt

„Þetta hefur verið viðburðaríkt. Það hefur verið mikið, svo það verður sérstakt að fá smá pásu til að meðtaka alla þessa atburði,“ sagði Sturla Holm Lægreid við norska ríkisútvarpið.

Þessi 29 ára gamli skíðaskotfimimaður vann fimm verðlaun á Vetrarólympíuleikunum og þetta endaði allt með frábærum dögum á heimavelli í Holmenkollen um helgina, þar sem hann vann tvær af þremur keppnum.

„Endirinn hér hefur veitt mér mikla gleði, svo það tek ég svo sannarlega með mér áfram,“ sagði Sturla. Árangurinn hefur batnað jafnt og þétt yfir veturinn og undir lok tímabilsins var Sturla besti karlkyns skíðaskotfimimaður í heimi.

Hann hafði unnið sjö heimsbikarsigra í röð þar til Johan-Olav Botn vann síðustu hópræsikeppnina á sunnudag. Það hefur séð til þess að brosið og góða skapið er komið aftur.

Komið sterkari út úr öllu

„Mér finnst ég hafa fundið sjálfan mig aftur í gegnum allt sem hefur gerst. Ég myndi segja að ég hafi komið sterkari út úr öllu sem ég hef gengið í gegnum,“ sagði Sturla.

Því það hefur blásið hressilega um Lægreid á þessu tímabili. Fyrir jól hafði hann ekki einu sinni náð á verðlaunapall í einstaklingskeppni í heimsbikarnum og fyrir Ólympíuleikana var óvíst hvort hann fengi að keppa í meiru en venjulegri vegalengd.

Í fyrstu grein náði hann bronsverðlaunum. Svo lét hann sprengjuna falla í viðtalinu sem leiddi til fyrirsagna um allan heim. Í beinu viðtali við NRK játaði skíðaskotfimimaðurinn framhjáhald.

Hvað á maður að segja?

„Hvað á maður að segja? Allir sem hafa gengið í gegnum erfiða tíma læra eitthvað um sjálfa sig. Þá hefur maður tækifæri til að annaðhvort grafa sig niður eða nota það til að vaxa og verða að þeirri manneskju sem maður telur sig í raun vera,“ sagði Sturla.

Í kjölfar hins umdeilda viðtals hefur stormað um norsku skíðaskotfimistjörnuna en hann svaraði því með því að ná í fjögur verðlaun í viðbót og endaði sem einn af íþróttamönnunum með flest verðlaun á Vetrarólympíuleikunum í Mílanó og Cortina.

Betri útgáfa af sjálfum mér

„Ég finn að ég hef virkilega notað erfiðleikana til að móta mig í betri útgáfu af sjálfum mér,“ sagði Sturla en hvað hefur hann lært?

„Svolítið af hverju, en mest af öllu að maður á ekki að gefast upp. Maður verður alltaf að halda áfram að berjast og það er alltaf mikilvægt að hafa drauma og markmið. Maður verður að hafa sýn á hvernig hlutirnir geta batnað,“ svarar Sturla.

Tíminn fram að næsta keppnistímabili verður nýttur í ýmislegt hjá Lægreid.

„Ég ætla í bíó að sjá „Project Hail Mary“. Það er bók sem ég hef lesið tvisvar, svo ég hlakka til. Og svo ætla ég á mótorhjólanámskeið. Þetta er svona sitthvað af hverju,“ sagði Sturla.