Danielle og Þórir bestu leikmenn ársins

Ágúst Orri Arnarson skrifar 27. mars 2026 13:00

Þórir Guðmundur Þorbjarnarson og Danielle Rodriguez eru leikmenn ársins í Bónus-deildunum í körfubolta. Þau voru verðlaunuð ásamt mörgum öðrum á lokahófi KKÍ á Fosshótelinu í dag.

Lokahófið var í beinni útsendingu á Vísi. Lista með öllum verðlaunahöfum má finna neðar í fréttinni.

KR og Njarðvík eiga bestu leikmennina

Þórir Þorbjarnarson var kjörinn leikmaður ársins í fyrsta sinn en hann hefur verið í úrvalsliðinu þrjú ár í röð. Liðsfélagi hans hjá KR, Linards Jaunzems, var kjörinn besti erlendi leikmaðurinn.

Danielle Rodriguez var kjörin leikmaður ársins í fyrsta sinn en hún hefur áður verið kjörin besti erlendi leikmaðurinn. Liðsfélagi hennar hjá Njarðvík, Brittany Dinkins, var kjörinn besti erlendi leikmaðurinn annað árið í röð.

Besti varnarmaðurinn annað árið í röð

Ægir Þór Steinarsson var kjörinn varnarmaður ársins í Bónus deild karla og hefur nú unnið verðlaunin tvö ár í röð, þrisvar í heildina.

Enginn deildarmeistari í úrvalsliði karla

Athyglisvert er að bæði Tindastóll, sem endaði í öðru sæti, og nýkrýndir deildarmeistarar Grindavíkur eiga engan leikmann í úrvalsliði karla en þjálfari Grindavíkur, Jóhann Þór Ólafsson, var valinn þjálfari ársins.

Deildarmeistarar Hauka eiga varnarmann ársins, Sigrúnu Björg Ólafsdóttur, og líka einn fulltrúa í úrvalsliði kvenna, Tinnu Guðrúnu Alexandersdóttur.

Suðurnesjaliðin Njarðvík, Keflavík og Grindavík eiga einnig fulltrúa þar ásamt nýliðum KR, sem eiga líka besta unga leikmanninn, Rebekku Rut Steingrímsdóttur og besta þjálfarann, Daníel Andra Halldórsson.