Fram fær Ægi Jarl fyrir fyrsta leik

Legið hefur fyrir að Ægir væri á leið til Fram en spurningin var hvort það yrði fyrir tímabilið eða í sumar.

Samkvæmt frétt Fótbolta.net í dag hefur Fram nú náð samkomulagi við AB um að fá Ægi nú þegar og er hann væntanlegur í byrjun apríl.

Það þýðir að Ægir ætti að mega spila gegn ÍA í fyrstu umferð Bestu deildarinnar, 12. apríl, en samkvæmt Fótbolta.net glímir hann hins vegar við meiðsli og óvíst að hann nái fyrsta leik. 

Ægir hefur ekkert spilað með AB á þessu almanaksári og var aðallega í hlutverki varamanns fyrri hluta þessa tímabils.

Ægir er uppalinn Fjölnismaður en lék með KR í sex tímabil áður en Jóhannes Karl Guðjónsson, núverandi þjálfari FH, fékk hann til AB.

Á tímanum hjá KR lék Ægir meðal annars undir stjórn Rúnars Kristinssonar, og fögnuðu þeir Íslandsmeistaratitli saman, og nú fær Rúnar aftur að njóta krafta þessa 28 ára gamla, öfluga leikmanns.