Í fyrsta sinn á þessari öld sem enginn fellur á lyfja­prófi

Alþjóða lyfjaprófunar stofnunin (ITA) birti lokaniðurstöður úr lyfjaprófum 1848 íþróttamanna, eða um 63.4 prósent allra þeirra sem kepptu á Vetrarólympíuleikunum. Þetta er í annað sinn sem aðeins hluti af íþróttafólkinu þarf að taka lyfjapróf á leikunum sjálfum en allir þurftu að taka lyfjapróf í aðdraganda leikanna.

Ekkert jákvætt sýni fannst þrátt fyrir að fleiri væru prófaðir en á Vetrarólympíuleikunum í Peking 2022. Þar voru um 55 prósent af íþróttafólkinu prófuð og fjögur jákvæð sýni fundust.

Sýnin eru ýmist tekin með þvag- eða blóðprufu. Þau verða svo geymd næstu tíu árin á rannsóknarstofu í Róm og verða reglulega prófuð aftur þegar ný tækni ryður sér til rúms. Það gætu því mögulega fundist jákvæð sýni frá þessum Vetrarólympíuleikum í framtíðinni.

Eina lyfjahneykslið á þessum Vetrarólympíuleikum tengist því ítölsku skíðaskotfimikonunni Rebecca Passler. 

Passler féll vissulega á lyfjaprófi í aðdraganda leikanna en ítalska Ólympíusambandið samþykkti útskýringar hennar og dróg niðurstöðuna til baka.

Passler hafði nefnilega borðað Nutella með sömu skeið og móðir hennar sem glímir við krabbamein. Þannig smitaðist ólöglegt lyf frá móðurinni til Passler.

Allt kom síðan fyrir ekki því Passler rétt missti af landsliðssæti hjá Ítalíu og keppti á endanum ekkert á Vetrarólympíuleikunum.