Fljótari en Bolt var á hans aldri

Gout hljóp á 19,67 sekúndum í gær og setti heimsmet í flokki tuttugu ára og yngri. Þetta er í fyrsta sinn sem Gout hleypur tvö hundruð metrana á undir tuttugu sekúndum.

Tíminn sem hann náði í gær er betri en tími Bolts þegar hann var táningur. Bolt hljóp tvö hundruð metrana á 19,93 sekúndum fyrir 22 árum. 

Jamaíkumaðurinn var aðeins sautján ára þegar hann náði þessum tíma en bætti hann aldrei meðan hann var á táningsaldri. Bolt setti svo fjölda meta í fullorðinsflokki og varð meðal annars áttfaldur Ólympíumeistari.

„Þetta er það sem ég hef beðið eftir,“ sagði Gout eftir hlaupið í gær. Tíminn sem hann náði þá er besti tími ársins í tvö hundruð metra hlaupi.

Gout var ekki sá eini sem hljóp undir tuttugu sekúndum í tvö hundruð metra hlaupinu í gær. Aidan Murphy kom annar í mark á 19,88 sekúndum.

„Við erum með svo stórkostlega íþróttamenn í Ástralíu og við gerum hvorn annan betri. Tveir Ástralir undir tuttugu sekúndum. Það er magnað,“ sagði Gout.

„Þungu fargi er af mér létt vitandi að tíminn var löglegur og ég hafi hraða og líkama til að hlaupa svona. Mér líður afar vel og er tilbúinn í meira.“

Gout hafði áður hlaupið á 19,84 sekúndum en í meðvindi. Tíminn í gær var hins vegar fullkomlega löglegur.