Lyon gerði það sem Liverpool tókst ekki á móti PSG

Brasilíumaðurinn ungi Endrick, sem er í láni frá Real Madrid, var bæði með mark og stoðsendingu í kvöld.

Paris Saint-Germain fékk Lyon í heimsókn og gestirnir unnu 2-1 sigur. Bæði mörkin komu í fyrri hálfleiknum.

PSG er því aðeins með tveggja stiga forskot á Lens á toppi frönsku deildarinnar.

Endrick kom Lyon í 1-0 á 7. mínútu og Brasilíumaðurinn ungi lagði svo upp mark fyrir Afonso Moreira á 18. mínútu.

Gonçalo Ramos fékk kjörið tækifæri til að koma PSG inn í leikinn á 34. mínútu en Dominik Greif varði þá frá honum vítaspyrnu.

Khvicha Kvaratskhelia minnkaði muninn í uppbótartíma leiksins en nær komust Parísarmenn ekki.