Mourinho býður Real Madrid krafta sína

Spænski miðillinn Diario AS fullyrðir að Jorge Mendes, umboðsmaður Mourinho, sé búinn að setja sig í samband við Madridinga til að taka af allan vafa um að Portúgalinn standi til boða. Mourinho er reyndar þjálfari Benfica en forráðamenn Real hafa núna fengið upplýsingar um klásúlur í samningi hans við félagið.

AS tekur fram að vissulega hafi ákveðin læti verið í kringum Mourinho á þriðja og síðasta tímabili hans með félagið á sínum tíma en segir að samband hans við Florentino Pérez sé gott og að Mourinho hafi aldrei leynt aðdáun sinni á Real Madrid.

Margir kostir séu hins vegar til skoðunar hjá forráðamönnum spænska stórveldisins og að lokaákvörðun varðandi Arbeloa verði tekin á næstu vikum. Eftir fallið úr Meistaradeild Evrópu og í ljósi forskots Barcelona á toppi spænsku 1. deildarinnar þykir hins vegar líklegast að nýr þjálfari komi inn í sumar.

AS segir að nöfn á borð við Pochettino, Nagelsmann, Allegri, Klopp og Deschamps séu á meðal þeirra sem nefnd hafi verið en að nú sé í forgangi að ljúka tímabilinu með eins miklum sóma og hægt sé úr þessu.