Tví­fram­lengt í spennu­trylli í Eyjum

Einvígi liðanna til þessa hefur verið kyngimagnað og stóð það 1-1 eftir tvo mjög svo jafna leiki í undanúrslitaeinvíginu fram að leik kvöldsins. 

Sá olli heldur ekki vonbrigðum og var spennandi allt til loka venjulegs leiktíma þar sem mark frá Jóhönnu Margréti Sigurðardóttur fyrir Hauka kom hafnfirska liðinu einu marki yfir í stöðuna 28-29. Marki hennar var hins vegar snögglega svarað af Kristrúnu Ósk Hlynsdóttur fyrir ÍBV á lokaandartökum leiksins, 29-29. Því þurfti að grípa til framlengingar. 

Áfram héldu liðin að refsa hvort öðru á víxl. Þegar að Haukakonur virtust vera að fara ná upp smá forskoti komu Eyjakonur sterkar til baka. Birna Berg Haraldsdóttir fékk tækifæri til þess að tryggja ÍBV dramatískan sigur á lokaandartökum framlengingarinnar eftir að gestirnir höfðu tapað boltanum en skot hennar fór yfir markið. Staðan 34-34 og því þurfti að fara í aðra framlengingu. 

Leikurinn frábær auglýsing fyrir íslenskan handbolta en það voru heimakonur í liði ÍBV sem reyndust hlutskarpari á lokamínútum seinni framlengingarinnar. Þar var það Ásdís Halla Hjarðar sem skoraði sigurmarkið þegar rétt rúm mínúta eftir lifði leiks. 

Lokatölur urðu 38-37 ÍBV í vil. Eyjakonur eru komnar 2-1 yfir í einvíginu og geta með sigri á Ásvöllum á Laugardaginn kemur tryggt sér sæti í úrslitaeinvígi deildarinnar. 

Sandra Erlingsdóttir var markahæst í liði ÍBV í kvöld með fjórtán mörk. Hjá Haukum var það Embla Steindórsdóttir sem var markahæst með þrettán mörk.