Guð­rún Karitas bætti Ís­lands­met og tryggði sér sæti á EM

Kast Guðrúnar sem varð að Íslandsmetið var upp á  73,88 metra á Kip Keino Classic mótinu í Naíróbí í Kenýa og hafnaði hún í þriðja sæti á þessu sterka móti að því er fram kemur í fréttatilkynningu frá Frjálsíþróttasambandi Íslands nú síðdegis.

Þetta er í annað sinn á skömmum tíma sem Guðrún Karítas bætir Íslandsmetið í greininni en hún kastaði 71,41 metra í Nicosia í mars. Elísabet Rut Rúnarsdóttir bætti síðan met hennar 18. apríl s.l. með kast uppá 72,89 metra.

Camryn Rogers frá Kanada sigraði keppnina með kasti upp á 80,03 metra og Rose Loga frá Frakklandi varð önnur með 75,19 metra. 

Þá hafnaði Katrine Koch Jacobsen frá Danmörku, sem er efst á topplista Evrópu í sleggjukasti, í fjórða sæti á eftir Guðrúnu.

Með árangrinum situr Guðrún nú í 5. sæti á Evróputopplista ársins, en Elísabet Rut Rúnarsdóttir er í 7. sæti. Ísland á því nú tvær konur meðal sjö bestu í Evrópu í sleggjukasti á árinu.