Sakar fram­kvæmda­stjóra Land­spítala um ó­sannindi

Ragnar telur að um ólögmæta uppsögn sé að ræða og hyggst láta reyna á málið fyrir dómstólum en hann er formaður Læknafélags Reykjavíkur. Stjórn félagsins hefur sömuleiðis gefið út að hún telji gjörninginn ólögmætan.

Ragnar segir að í bréfi sem honum hafi borist á föstudag frá Rafni Benediktssyni, framkvæmdastjóra bráða-, lyflækninga- og endurhæfingarþjónustu Landspítala, sé fullyrt að Ragnari hafi ekki verið sagt upp störfum í símtali þeirra þann 8. apríl heldur einungis verið boðaður á fund í tengslum við fyrirhugaða uppsögn. Ragnar segir þetta rangt.

„Hann var alveg skýr um að það væri verið að leggja niður starfið mitt og mér því sagt upp. Aðspurður sagði hann ríka aðhaldskröfu vera á spítalanum. Það veit Rafn Benediktsson mæta vel þó hann kjósi að segja aðra sögu. Hann er skýrmæltur maður og boðskapurinn stuttur og hnitmiðaður eins hans er von og vísa,“ segir Ragnar í færslu á Facebook-síðu sinni.

Þá hafnar Ragnar því að honum hafi verið boðið aukið starfshlutfall í umræddu símtali líkt og Rafn hafi fullyrt.

„Um slíkt var aldrei rætt. Fréttir af þessu las ég fyrst í fjölmiðlum daginn eftir.“

Ekki náðist í Rafn við vinnslu fréttarinnar og verður hún uppfærð ef svör berast. Í afriti af bréfi hans til Ragnars sem hinn síðarnefndi deilir segir að læknirinn hafi um tíma verið í launalausu leyfi frá spítalanum. Þá kemur fram að bréfið hafi verið sent með aðkomu lögfræðings hjá Mörkinni lögmannsstofu.

„Það er ótrúlegt að verða vitni að framferði stjórnenda Landspítala í minn garð,“ segir Ragnar. „Eftir allt sem á undan er gengið, farsælt starf og samvinnu með frábæru samstarfsfólki síðasta áratuginn. Að leggjast svo lágt að segja ósatt til að réttlæta gjörðir sínar. Að réttlæta ólögmæta uppsögn. Réttara hefði verið að biðjast afsökunar á þessu mistökum og axla ábyrgð. Af því hefði allavega verið einhver sómi.“

Fréttin er í vinnslu.