Gríðar­legt á­fall ÍBV fyrir úr­slitin

Nú hefur nefnilega komið í ljós að markvörðurinn frábæri Amalia Frøland sleit krossband í hné, í tvíframlengda oddaleiknum í Vestmannaeyjum í fyrrakvöld.

Frøland meiddist þegar hún ætlaði að fagna vítavörslu í framlengingunni og var strax ljóst að meiðslin væru líklega alvarleg.

ÍBV er nú á leið í úrslitaeinvígi við Val og þarf þar að spjara sig án Frøland sem verið hefur á meðal bestu markvarða Olís-deildarinnar. 

Það kemur því mikið til með að mæða á Ólöfu Maren Bjarnadóttur sem þó átti ríkan þátt í því að slá út Haukaliðið í undanúrslitunum. Næsti markvörður innan raða ÍBV er eftir því sem næst verður komist ekki nema 14 ára að aldri.