Sinner tók fram úr goð­sögnum með glæstum sigri

Þetta var fimmta ATP Masters 1000 mótið í röð sem Sinner vinnur en engum hefur áður tekist það. Rafael Nadal, Roger Federer og Novak Djokovic unnu allir fjögur mót í röð á sínum ferlum en Sinner toppaði goðsagnirnar.

Sinner er nú aðeins þremur sigrum frá Djokovic sem hefur unnið flest ATP Masters 1000 mót allra eða 31 talsins.

„Þetta er þýðingarmikið en á sama tíma, eins og ég hef alltaf sagt, get ég ekki borið mig saman við Rafa, Roger eða Novak. Það sem þeir afrekuðu er ótrúlegt. Ég spila ekki fyrir metin heldur sjálfan mig, fjölskylduna og liðið sem stendur mér að baki. Auðvitað er þetta samt þýðingarmikið, þetta eru stórar tölur,“ sagði Sinner eftir sigurinn í dag.

Sigurinn í dag var líka alveg sérlega öruggur. Það tók Sinner níu mínútur að ná 3-0 forystu, eftir sautján mínútur var hann kominn með 5-0 forystu og leiknum var lokið eftir aðeins 58 mínútur.

Ef Sinner heldur sigurgöngunni áfram og stendur uppi sem sigurvegari á heimavelli í Róm í næstu viku á opna ítalska meistaramótinu verður hann annar á eftir Djokovic til að vinna öll níu mótin á ATP mótaröðinni. Djokovic tókst það þegar hann var 31 árs en Sinner aðeins 24 ára.

Leiðin virðist líka vera greið fyrir Sinner því hans helsti keppinautur, Carlos Alcaraz, er meiddur og verður frá keppni fram yfir Opna franska að minnsta kosti.

„Hlutirnir geta breyst hratt. Það eru margir mjög, mjög öflugir tennisspilarar þarna úti og þeir reyna alltaf að vinna okkur. Oftast er pressan á mér en ég reyni að höndla það. Novak vann mig í Ástralíu [í undanúrslitum]. Við sjáum til, ég veit ekki hvað mun gerast.“