Hulda: Náðum góðum stoppum og þá kemur sóknin

Hulda var mætt í viðtal hjá Andra Má Eggertssyni strax eftir leik. Þar var hún spurð að því hvað hafi orðið til þess að Njarðvík sneri við 2-0 mun í sigur í einvíginu í oddaleik.

„Við bara gerðum okkar besta í vörninni. Vörnin skipti mestu máli í þessu einvígi og við stigum allar upp þar sem lið.“

Njarðvík var 13 stigum yfir í hálfleik, var einhver tilfinning að munurinn ætti að vera meiri miðað við hverstu góðar Njarðvíkingar voru í fyrri hálfleik?

„Já, það mætti alveg segja það. Við ætluðum að koma út úr hálfleiknum að halda áfram að byggja upp muninn en misstum hann aðeins niður. Við héldum svo bara áfram að ná góðum stoppum í vörninni en þá kemur sóknin okkar líka.“

Hvernig fannst Huldu Njarðvík byrja þriðja leikhlutann þegar Grindavík kom út af fítonskrafti og náði að naga niður forskot Njarðvíkinga og komast yfir um miðjan leikhluta.

„Þær fóru að hitta úr þriggja stiga skotunum sínum. Ellen Nyström fékk mörg opin þriggja stiga skot en við hertum síðan vörnina og þá kom þetta.“

Njarðvíkingar gengu svo frá leiknum í fjórða leikhluta.

„Þá gekk allt upp hjá okkur. Stúkan var bara geggjuð í kvöld það mættu svo margir sem hjálpaði okkur.“

Hvernig er svo tilhugsunin um að mæta Haukum í úrslitum og fá tækifæri til að hefna fyrir úrslita einvígið í fyrra?

„Bara geggjað. Ég hlakka mikið til.“