Martin stoðsendingahæstur í sigri

Það voru gestirnir í Jena sem byrjuðu leikinn betur og leiddu leikinn alveg fram á lokahluta annars leikhluta. Þá hrukku heimamenn í gír og sneru stöðunni sér í vil. 

Norris Agbakoko leiddi lið Alba Berlin í stigaskorun með alls 16 skoruð stig í leiknum og að lokum vann liðið átján stiga sigur. 

Martin spilaði 24 mínútur í leik dagsins og skoraði fimm stig, tók fjögur fráköst og gaf níu stoðsendingar sem er það mesta sem nokkur leikmaður á vellinum skilaði af sér þegar kemur að stoðsendingum. 

Um lokaleik liðanna í deildarkeppni þýsku úrvalsdeildarinnar var að ræða. Alba Berlin endar deildarkeppnina í öðru sæti og er því öruggt með sæti í úrslitakeppni deildarinnar. Það kemur í ljós eftir umspil liða sem enduðu í sjöunda til tíunda sæti deildarinnar hvaða liði Alba Berlin mætir í úrslitakeppninni.