Ó­sáttir við dómgæsluna og bolabrögð and­stæðings

Dubois sigraði Wardley í bardaga þeirra í Manchester á laugardaginn. Bardaginn var afar harður og eftir hann stórsá á andliti Wardleys.

Teymi hans vill meina að Howard Foster, sem dæmdi bardagann, hefði átt að taka fastar á ólöglegum höggum Dubois. Teymið vill meðal annars meina að Dubois hafi skallað Wardley.

Þá krefst teymið þess að fá útskýringar á því af hverju Foster skildi bardagakappana í sundur skömmu eftir að Wardley meiddi Dubois í lok 7. lotu.

Wardley sló Dubois tvisvar í gólfið í fyrstu þremur lotunum en endaði á því að tapa bardaganum í 11. lotu. Þetta var fyrsta tap hans á ferlinum. Dubois komst hins vegar aftur á sigurbraut eftir að hafa tapað síðasta bardaga sínum fyrir Úkraínumanninum Oleksandr Usyk í júlí síðastliðnum.

Svo gæti farið að þeir Wardley og Dubois mætist aftur en klásúla þess efnis er í samningum þeirra sem voru gerðir fyrir bardagann um helgina.