Karlotta hljóp alls 742,6 kíló­metra í Búlgaríu

Hlaupið í Sofiu hófst á verkalýðsdaginn og lauk í gær. Hlaupið var í almenningsgarði en brautin var 785 metra löng.

Karlotta hljóp sem áður sagði 742,6 kílómetra sem er Íslandsmet. Hún hafnaði í 8. sæti en Annabel Hepworth frá Ástralíu hrósaði sigri í hlaupinu. Hún hljóp alls 1043,3 kílómetra.

Alls hlupu þrír keppendur þúsund kílómetra eða meira: Hepworth, Huang Lan Yang (1019,7 km) og Ilvaka Nemcova (1005,6 km).

Mest hljóp Karlotta fyrsta daginn, eða 114,6 kílómetra. Á lokadegi keppninnar í gær hljóp hún 73,0 kílómetra.

Þegar Karlotta ræddi við Bítið á Bylgjunni á föstudaginn lýsti hún því hversu erfitt það væri að hlaupa svona langa vegalengd aftur og aftur.

„Þetta brýtur mann á allan hátt. En þetta styrkir mann líka einhvern veginn sem er líklega ástæðan fyrir því að hér eru fjörutíuogeitthvað manns að hlaupa þetta, og margir að gera þetta í fjórða, fimmta eða sjötta sinn,“ sagði Karlotta.

„Ég er að gera þetta í fyrsta sinn og er búin að læra ótrúlega mikið af þessum meisturum sem eru hérna. Hér eru nánast allir heimsmeistarar í þessum hlaupum og ég hef lært ótrúlega mikið. Mér fannst líka áhugavert að verða fyrsti Íslendingurinn til að keppa í tíu daga hlaupi og setja þannig Íslandsmet í tíu daga hlaupi,“ bætti Karlotta við.