Nýtum kosninga­réttinn

Kosningaþátttaka ungs fólks á Íslandi hefur farið minnkandi með árunum, þ.m.t. í sveitarstjórnarkosningum. Við unga fólkið í framboði fyrir Samfylkinguna í Kópavogi lítum á þetta sem áhyggjuefni enda eiga sveitarstjórnarkosningar erindi við alla óháð aldri.

Að nýta kosningaréttinn snýst um að velja fulltrúa sem maður treystir til að taka réttar ákvarðanir fyrir hönd allra bæjarbúa, þar með talið ungs fólks. Samfylkingin setur málefni ungs fólks í forgang hjá sér því þau málefni skipta sífellt meira máli. Við viljum skapa samfélag þar sem þessi hópur getur vaxið, dafnað og orðið virkur þátttakandi bæjarins til lengri tíma.

Samfylkingin mun gera Kópavoginn að enn betri stað fyrir ungt fólk að búa á og hér eru 4 hlutir sem við munum gera til að bæta aðstæður þeirra í Kópavoginum:

Í fyrsta lagi munum við bæta samgöngur. Við erum fylgjandi Borgarlínu þar sem hún stóreflir samgöngur allra íbúa höfuðborgarsvæðisins óháð faramáta þeirra. Umferðin á höfuðborgarsvæðinu er orðin of mikil og Borgarlínan er skynsamlegasta lausnin til þess að takast á við umferðarvandann. Við viljum að ungt fólk geti notið betri samgangna og komið sér á milli staða með betri og áreiðanlegri hætti.

Í öðru lagi munum við snúa þeirri þróun við sem hefur skapast á húsnæðismarkaði. Við ætlum að bjóða upp á fjölbreytta valkosti í húsnæðismálum og greiða veginn fyrir óhagnaðardrifin leigufélög í Kópavogi. Staða húsnæðismála í Kópavogi sýnir ábyrgðarleysi gagnvart þeim sem þurfa hvað mest á stuðningi að halda; ungu fólki og lágtekjuhópum. Ný greining ASÍ og BSRB afhjúpar að Kópavogsbær er langt eftir á miðað við önnur bæjarfélög þegar kemur að uppbyggingu íbúða í almenna íbúðar kerfisins. Með svokallaðri „0-stefnu“ meirihlutans hefur Bjargi verið neitað um lóðir til uppbyggingar á óhagnaðardrifnu húsnæði og í Kópavoginum er ekki ein einasta námsmannaíbúð. Þegar húsnæðismarkaðurinn er í ójafnvægi á sveitarfélagið að byggja í takt við þarfir allra hópa en ekki skilja ungt fólk og efnaminni íbúa eftir í kuldanum.

Í þriðja lagi munum við lengja opnunartíma sundlauga. Hvað er betra en kvöldsund með vinum? Fara í körfu í lauginni og taka eina troðslu? Steikja sig í heita pottinum eða gufu og kæla sig í kalda pottinum? Tala um pólitík við eldri borgara? Rekast á fullt af fólki og vinum sem maður myndi annars ekki hitta? Sundlaugarnar á Íslandi er menningin okkar og styður við félagslíf og lýðheilsu okkar allra. Við viljum nýta þessa dýrmætu auðlind í Kópavoginum betur og hafa sundlaugarnar lengur opnar. Við munum hafa báðar sundlaugar opnar á rauðum dögum og tryggja að þú komist í sundlaug sem er ekki troðin á frídögum. Miðnæturopnanir verða reglulegar og við bætum menningarlífið með viðburðum og skemmtunum í laugunum.

Í fjórða lagi munum við stórefla menningar- og félagslíf barna og ungmenna í Kópavogi, með sérstakri áherslu á þau sem stunda ekki hefðbundnar íþróttir. Öflugt félagslíf er lykillinn að bættri geðheilsu og vellíðan. Til þess að hvert og eitt barn fái að blómstra þurfum við að bjóða upp á fjölbreyttari tækifæri í greinum lista, leiklistar og rafíþrótta svo eitthvað sé nefnt. Með því að efla menningarlíf og skapa nýja samkomustaði, til dæmis með því að gera enn betur við ungmennahúsið Molann, getum við spornað gegn félagslegri einangrun og bætt geðheilsu ungs fólks. Við viljum skapa bæjarfélag þar sem öll ungmenni hafa aðgang að hvetjandi og félagslegu andrými sem styrkir félagsleg tengsl og styður við andlega heilsu þeirra til frambúðar.

Það skiptir máli hver er við stjórnvölinn og Samfylking í Kópavogi býður upp á nýja forgangsröðun í þágu Kópavogsbúa. Við hvetjum ungt fólk til að kjósa til að hafa áhrif á framtíðina og sitt nærumhverfi. Mætum á kjörstað 16.maí!

Á kjördag verður hægt að kjósa frá 9:00-22:00. Íbúar vestan við Reykjanesbraut og í Lindahverfi kjósa í íþróttahúsinu Smáranum, Dalsmára 5. Íbúar Austan við Reykjanesbraut kjósa í íþróttahúsinu Kórnum, Vallakór 12. Hægt er að kjósa utankjörfundar til 15.maí í Hlíðasmára 1, Kópavogi og er opnunartíminn þar 10:0021:00.

Höfundar skipa 10. og 11. sæti á lista Samfylkingarinnar í Kópavogi.