Innlent

Flug­völlur er ekki bara upp á punt

Kristján Már Unnarsson skrifar
Eyjólfur Ármannsson innviðaráðherra fer með málefni flugvalla í ríkisstjórninni.
Eyjólfur Ármannsson innviðaráðherra fer með málefni flugvalla í ríkisstjórninni. Sigurjón Ólason

Innviðaráðherra hyggst láta greina hvort gullhúðun Evróputilskipana hafi átt sér stað þegar íslenskum flugvöllum var gert að fá bæði starfsleyfi og rekstrarleyfi. Heilbrigðisnefnd Reykjavíkur er sökuð um að fara langt út fyrir valdheimildir sínar með því að reyna að þrengja að Reykjavíkurflugvelli.

Í kvöldfréttum Sýnar var sýnt frá fundi Flugmálafélags Íslands um flugvöllinn með frambjóðendum í síðustu viku. Þar fullyrti Karl Alvarsson, formaður fagráðs um flugmál, að gullhúðun Evróputilskipana hefði átt sér stað þegar flugvöllum á Íslandi var, til viðbótar við rekstrarleyfi Samgöngustofu til Isavia, gert að fá starfsleyfi frá heilbrigðiseftirlitum sveitarfélaga. Slíkt fyrirkomulag gilti um enga aðra evrópska flugvelli.

„Fyrir flugvelli hérna á Íslandi er þá skýrt dæmi um séríslenska gullhúðun á EES-reglum,“ sagði Karl, sem áður var yfirlögfræðingur Isavia.

Karl Alvarsson, fyrrverandi yfirlögfræðingur Isavia, er formaður fagráðs um flugmál, sem tók við hlutverki flugráðs.Bjarni Einarsson

En hyggst innviðaráðherra bregðast við þessu á einhvern hátt?

„Já, við ætlum að greina þetta betur, alveg klárlega,“ svarar Eyjólfur Ármannsson.

„Þetta er mjög áhugavert atriði sem er hér komið fram með. Virkilega áhugavert að við séum með gullhúðun, meðal annars með starfsleyfi fyrir flugvöllinn og svo líka rekstrarleyfi,“ segir ráðherrann.

Hér er í raun nýjasta dæmið um átökin um flugvöllinn en heilbrigðisnefnd Reykjavíkur, undir formennsku Hjálmars Sveinssonar, borgarfulltrúa Samfylkingarinnar, kynnti í vetur drög að nýju starfsleyfi, sem ráðamenn flugvallarins hafa lýst sem mjög íþyngjandi.

„Okkur sem að þessum málum koma virðist ljóst að eftirlitið hafi farið langt út fyrir þær valdheimildir, sem þeir hafa, í drögum að starfsleyfinu,“ sagði Karl og bætti við:

„Hvorki borgarráð, borgarstjórn né Heilbrigðiseftirlit Reykjavíkur fer með þær valdheimildir sem að gera þeim kleift að stöðva eða takmarka lendingar loftfara á Reykjavíkurflugvelli. Þær valdheimildir liggja hjá öðrum stofnunum ríkisins.“

Samkvæmt drögum að starfsleyfinu er ætlunin að takmarka mjög þyrlu- og þotuflug, en einnig kennsluflug. Tilgangurinn er sagður sá að draga úr ónæði og er vísað til mikillar fjölgunar kvartana yfir hávaða.

Drög að nýju starfsleyfi Reykjavíkurflugvallar gera meðal annars ráð fyrir að takmarka mjög einkaþotur á vellinum. Hér eru þotur forsætisráðherra Danmerkur, Noregs og Svíþjóðar nýlentar haustið 2024. Bílalestir bíða þess að aka með ráðherrana og fylgdarlið til sameiginlegs ráðherrafundar.KMU

„Þeir virðast byggja fyrst og fremst á fjölda kvartana en ekki á hljóðmælingum, fjölda kvartana út af hávaða, en ekki á hljóðmælingum,“ segir Eyjólfur.

„En við erum bara að skoða þetta mál nánar. En það breytir því ekki að flugvöllurinn er ekki að fara.“

Ráðherrann segir grundvallaratriði að hann nýtist.

„Við ætlum ekki að hafa flugvöll þarna bara upp á punt. Það þarf að fljúga og lenda á honum.

Þetta er bara eins og með fimm hæða hús. Það verður að nota allar hæðirnar af húsinu, ekki rétt? En ekki bara einhvern pínulítinn hluta,“ segir Eyjólfur Ármannsson innviðaráðherra.

Hér má sjá þrjár einkaþotur norrænna forsætisráðherra lenda í röð á vellinum fyrir tveimur árum:

Reykjavíkurflugvöllur Heilbrigðiseftirlit Borgarstjórn Ríkisstjórn Kristrúnar Frostadóttur Flug Umhverfismál EES-samningurinn Evrópusambandið

Tengdar fréttir

„Ég elska þennan flugvöll“

Flugvöllurinn, flugið og flokkarnir er yfirskrift fundar sem hófst nú síðdegis á Hótel Loftleiðum á vegum Flugmálafélags Íslands. Þar voru fulltrúar allra framboða spurðir um afstöðuna sína til flugvallarins.

Gullhúðun að flugvellir þurfi starfsleyfi heilbrigðiseftirlits

Karl Alvarsson, formaður fagráðs um flugmál og fyrrverandi yfirlögfræðingur Isavia, segir séríslenska gullhúðun Evróputilskipana hafa átt sér stað þegar flugvöllum á Íslandi var gert að fá starfsleyfi frá heilbrigðiseftirlitum, - slíkt gildi um enga aðra evrópska flugvelli. Þá segir hann Heilbrigðiseftirlit Reykjavíkur fara langt út fyrir sínar valdheimildir með því að reyna að þrengja að starfsemi Reykjavíkurflugvallar.

Vilja losna við einkaþotur og þyrlur af Reykjavíkurflugvelli

Félagar í samtökunum Hljóðmörk - Íbúasamtök gegn óþarfa flugumferð á Reykjavíkurflugvelli krefjast þess að óþarfa flug hverfi frá Reykjavíkurflugvelli. Að baki samtökunum standa íbúar úr Hlíðum, Vesturbæ Reykjavíkur og Kársnesi. Samtökin vilja einnig fá aðild að opinberum nefndum og samráðshópum um stefnumótun flugvallarins.

Hyggst reisa nýja flugstöð og festa flugvöllinn í sessi

Innviðaráðherra hyggst festa Reykjavíkurflugvöll í sessi og byggja nýja flugstöð. Forsætisráðherra segir ekki hægt að láta flugvöllinn grotna niður meðan ekki finnist aðrir kostir. Forstjóri Icelandair segir að ekki muni standa á félaginu að fara í samstarf við stjórnvöld um uppbyggingu.

Gangi í berhögg við samninga að festa Reykjavíkurflugvöll í sessi

Borgarfulltrúi Samfylkingarinnar segir Samgönguáætlun ganga í berhögg við samninga Reykjavíkurborgar og stjórnvalda um að finna Reykjavíkurflugvelli nýjan stað. Borgin ætli enn að færa æfingaflug, einkaflug og þyrluflug úr Vatnsmýri en nú stendur til að byggja nýja flugstöð á vellinum.

Mest lesið


Fleiri fréttir

Sjá meira


×

Mest lesið