Mourinho fór taplaust í gegnum tíma­bilið: „Fram­tíð mín mun ráðast í vikunni“

Benfica vann 3-1 gegn Estoril í lokaleiknum og lauk deildarkeppninni með 23 sigra, 11 jafntefli en engin töp. Fótboltinn sem liðið spilaði og öll jafnteflin sem sá bolti skilaði kostuðu þó mikið.

Benfica var á endanum átta stigum frá toppliði Porto. Sporting varð í öðru sæti, sex stigum á eftir Porto.

Þetta er í annað sinn sem Benfica fer taplaust í gegnum tímabilið í Portúgal án þess að verða meistari. Það gerðist einnig árið 1978 þegar Porto vann deildina á markatölu.

Sigurinn í gær var líklega síðasti leikur liðsins undir stjórn Jose Mourinho. Hann er eftirsóttur af Real Madrid og forseti Spánarliðsins, Florentino Perez, hefur sett sig í samband við umboðsmann Mourinho, Jorge Mendes.

„Framtíð mín mun ráðast í vikunni. Ég þarf tíma. Ég þarf pláss. Ég þarf að taka mína eigin ákvörðun. Þessi vika verður mikilvæg. Ég er ekki með samningsboð frá Real Madrid en að fela mig og segja að það sé ekkert í gangi, ég get það ekki. Það er eitthvað, en ekki við mig beint.“