Erind­reki Trumps fékk skýr skila­boð frá Græn­lendingum

Í kvöldfréttum Sýnar mátti sjá Jeff Landry, ríkisstjóra Louisiana og sérlegan erindreka Trumps, lentan á flugvellinum í Nuuk. Grænlendingar sem sáu þotu Bandaríkjastjórnar komna að flugstöðinni í fyrradag með erindrekann um borð virtust ekki hrifnir.

„Þeir geta komið til Grænlands en þeir geta ekki yfirtekið landið,“ sagði Mathias Lundblad, smiður í Nuuk.

„Þetta er ögrandi á vissan hátt. Bandaríkjamenn hafa stjórnað ferðinni um nokkurt skeið og mér sýnist þeir gera það sem þeim hentar án þess að spyrja Grænlendinga,“ sagði Mads Kirk, íbúi í Nuuk.

Erik Rasmussen lögfræðingur sagði dönsku stöðinni TV 2 að í augum Grænlendinga væri Jeff Landry bara ferðamaður sem gæti bara snúið við og farið heim. Spurður hvað hann myndi segja við hann ef þeir hittust á götu:

„Ég myndi líklega segja: Farðu til fjandans,“ svaraði Erik Rasmussen.

Jeff Landry fékk leiðsögn um miðbæ Nuuk í fylgd Jørgens Boassen, helsta grænlenska stuðningsmanns Trumps, en opinber tilgangur heimsóknar erindrekans er að sitja ráðstefnu um framtíð Grænlands. En hvað vill hann ræða við Grænlendinga?

„Tækifæri, viðskiptatækifæri til þess að auka viðskipti Bandaríkjanna á Grænlandi og leita leiða til að styrkja sambandið,“ svaraði Jeff Landry í viðtali við TV 2, sem sjá má hér í sjónvarpsfrétt Sýnar:

-Varstu í sambandi við Trump forseta fyrir þessa heimsókn?

„Já, ég talaði við hann í gærkvöldi.“

-Um hvað rædduð þið?

„Hann sagði: „Farðu þangað og eignastu fullt af nýjum vinum“,“ svaraði erindreki Trumps.

Jeff Landry ræddi við þá Jens-Frederik Nielsen, formann landstjórnar Grænlands, og Múte B. Egede utanríkisráðherra, sem sagði þetta að fundi loknum:

„Hann fékk skýr skilaboð um þau mörk sem við drögum og það sem við höfum sagt allan tímann: Grænland er ekki til sölu. Það er ekki hægt að yfirtaka land í eigu grænlensku þjóðarinnar,“ sagði utanríkisráðherrann.

Og fréttamenn hafa hópast um Jeff Landry á götum Nuuk.

„Við komum til að læra og hlusta,“ sagði hann.

-Eru margir fundir á dagskrá á ráðstefnunni? Hvaða skilaboðum býstu við?

„Ég vil heyra hvaða tækifæri eru í boði fyrir okkur til að auka enn frekar umsvif Bandaríkjanna hér á Grænlandi,“ svaraði Jeff Landry, sérlegur erindreki Trumps gagnvart Grænlandi.