Viktor Bjarki fór meiddur af velli skömmu fyrir lands­leik

Viktor Bjarki lagðist í grasið á 37. mínútu leiksins og var skipt af velli fyrir Elias Achouri. 

Hann hefur verið að glíma við meiðsli að undanförnu og missti alfarið af síðasta leik FCK vegna meiðsla í kálfa. Viktor fékk síðan högg á hina löppina þegar hann meiddist í kvöld.

Framherjinn ungi var nýlega valinn í landsliðshóp Íslands í fyrsta sinn, fyrir æfingaleik gegn Japan þann 31. maí.

Úrslitaleikur erkifjandanna fór alla leið í framlengingu. FCK tók forystuna í leiknum og hlutirnir litu vel út því Bröndby var manni færri en Mads Frokjær tókst að jafna 1-1.

Í framlengingunni var FCK sterkari aðilinn og tók forystuna. Brondby náði síðan að setja boltann í netið en jöfnunarmarkið var dæmt af. FCK fagnaði svo 3-1 sigri eftir annað mark frá Youssoufa Moukoko.

FCK hefur því, þrátt fyrir mikið vonbrigðatímabil, tryggt sér sæti í Sambandsdeildinni.

Fréttin hefur verið uppfærð með úrslitum framlengingar...