„Við skoðuðum þennan markað og hann var allur í lausu lofti“

Vinirnir Baldvin Búi Magnússon og Viktor Snær Sigurðsson fóru að skoða íslenskan bókunarmarkað á síðasta ári og uppgötvuðu vandamál: Þegar maður er að skipuleggja viðburð þarf oft að leita á mörgum stöðum eftir skemmtikrafti og svo eru samskiptaleiðirnar margar og ótraustar.

„Við skoðuðum þennan markað og hann var allur í lausu lofti, þetta var gert í gegnum messenger, símtöl, tölvupósta og skilaboð á netinu. Það var engin skotheld og örugg leið til að bóka listamanninn, sérstaklega ef eitthvað myndi koma upp á. Við sáum lausn á þessu vandamáli sem við gátum boðið bæði listamönnum og skipuleggjendum upp á,“ segir Viktor.

Þeir félagarnir byrjuðu að vinna að verkefninu síðasta haust og vefsíðan fór í loftið fyrir tveimur mánuðum. Þar geta skipuleggjendur fundið skemmtikrafta, sent fyrirspurnir, fengið verðtilboð og klárað bókun á einfaldan og öruggan hátt. Listamenn hafa skýra yfirsýn yfir fyrirspurnir, tilboð og bókanir.

Erfiðast að hanna sjálft bókunarferlið

Maður staldrar strax við nafnið Outro sem er enskt orð yfir niðurlagshluta í lagi eða tónverki. Viktor segir nokkrar ástæður hafa verið fyrir nafnavalinu.

„Það var ekkert flókin hugmyndavinna á bak við sjálft nafnið. Þetta var eitthvað sem þurfti að tilheyra tónlistarheiminum að einhverju leyti, þurfti að vera eitthvað sem Íslendingar gætu sagt og eitthvað sem er stutt, einfalt og getur höfðað til markaða í öðrum löndum,“ segir hann.

Heildarvinnan á bak við sköpun síðurinnar hafi þó verið strembin.

„Þetta er búið að taka langan tíma, fyrst þurfti að ákveða útlitið, litina og nafnið, hvað mun skera okkur frá öðrum. Það tók marga mánuði og svo þegar það var komið þurftum við að byrja að hanna alla ferla, hvernig allt virkar og alla skilmála,“ segir Viktor.

Stærsta áskorunin við síðuna hafi verið að hanna sjálft bókunarferlið, það er kerfið í kringum það hvernig listamenn eru bókaðir.

„Á íslenska markaðnum eru engar fastar reglur í dag. Stundum er greitt eftir gigg, stundum fyrir, skilmálar eru engir og greiðsluleiðir oft óljósar. Þegar annar aðilinn hættir við, hvort sem það er listamaður eða skipuleggjandi, er nánast ekkert öryggi til staðar. Við þurftum að greina þetta frá grunni. Tala við listamenn og skipuleggjendur, skilja hvernig þetta gengur fyrir sig í dag og ákveða svo hvernig það ætti raunverulega að virka. Á sama tíma máttum við ekki gera kerfið of stíft. Það þurfti að vera nógu sveigjanlegt til að passa við ólíkar aðstæður, hvort sem það er DJ í einkapartýi eða hljómsveit á stóru fyrirtækjahófi.“

Áður en síðan fór í loftið undirbjuggu þeir jarðveginn til að fá listamenn og skemmtikrafta inn á síðuna.

„Við heyrðum í öllum sem okkur datt í hug í byrjun. Síðan byrjaði orðið að berast og við byrjuðum að auglýsa líka og þá byrjaði fólk að skrá sig á fullu. Þannig hefur þetta komið til okkar,“ segir hann.

Smáforrit á leiðinni

Vefsíðan Outro.is er tilbúin og í fullu fjöri en þeir félagar standa í frekari þróun.

„Við erum að undirbúa smáforrit (e. app) fyrir listamenn sem einfaldar þetta. Núna fá allir listamenn sms þegar það kemur ný fyrirspurn en við teljum að smáforrit myndi einfalda þetta og þá fengi fólk tilkynningar beint þaðan,“ segir Viktor.

„Markmiðið er síðan að reyna að fullkomna þetta eins mikið og mögulegt er. Markaðurinn er stór og við viljum reyna að fá fyrirtæki inn og fleiri einstaklinga til að nota þetta. Núna er komin betri, öruggari og þægilegri leið til að bóka listamenn.“

Þeir félagar eru báðir að vinna annars staðar þannig Outro er hliðarverkefni eins og stendur en kannski breytist það.

„Ég er hjá öðrum fyrirtækjum og hinn eigandinn er í annarri vinnu. Þetta er hliðarverkefni eins og er en vonandi verður þetta sjálfbært í framtíðinni,“ segir Viktor.