„Gekk um eins og upp­vakningur“ í hitabylgjunni á Opna franska

Hitinn í París er óvenjuhár miðað við árstíma og meira að segja hærri þessa dagana en á Ólympíuleikunum 2024, sem fóru fram í júlí og ágúst.

Hitinn náði um 33 gráðum á Roland Garros í gær og hefur verið yfir 30 gráður fyrstu daga mótsins. Búist er við svipuðu veðurfari það sem eftir er vikunnar en mótið klárast þann 7. júní.

Þetta hafði sannarlega áhrif á Casper Ruud, sem vann sinn leik í fyrstu umferðinni í gær, en ofhitnaði í leiðinni.

„Þetta var eins og hitaslag. Ég upplifði eitthvað svipað fyrir nokkrum árum þegar ég spilaði í Washington D.C. og þurfti þá að hætta keppni í þriðja setti. 

Það er eina skiptið sem ég hef fundið fyrir því sama og ég fann fyrir í dag í fjórða settinu, þar sem mér fannst ég á köflum vera virkilega ringlaður og virkilega þreyttur. 

Ég gekk um eins og uppvakningur,“ sagði Norðmaðurinn en hann náði að klára Roman Safiullin 3-2 og mætir Hamad Medjedovic í næstu umferð.