Meistararnir einum sigri frá úrslitaeinvíginu

Wembanyama hafði skilað 41 og 33 stigum í síðustu leikjum en átti sinn versta leik í seríunni og skoraði aðeins 20 stig í nótt. 

Skotnýting hans var slök, 4 af 15 skotum utan af velli fóru ofan í. Vítanýtingin bætti upp fyrir það en Wembanyama skoraði þar úr 12 af 12 skotum.

„Hann verður að taka fleiri en 15 skot, meira að segja með öllum vítunum. Hann verður að skora meira en 20 stig, sannarlega,“ sagði Mitch Johnson, þjálfari Spurs. 

Wembanyama veitti blaðamönnum ekki viðtal eftir leik. 

Ekkert verður þó tekið af ríkjandi meisturum Oklahoma City Thunder, sem áttu öflugan leik og fengu mikið framlag frá bekknum.

Shai Gilgeous-Alexander var að venju stigahæstur, með 32 stig, en varamaðurinn Alex Caruso kom á eftir honum með 22 stig. Jared McCain, sem er alla jafnan varamaður en fékk að byrja leikinn í fjarveru Jalen Williams og Ajay Mitchell, skoraði 20 stig.

Allt annað var að sjá til Thunder liðsins í nótt en í síðasta leik. Síðast skoraði liðið aðeins 82 stig í öllum leiknum en sú tala var komin á töfluna þegar þriðji leikhluti var nýhafinn í nótt.

New York Knicks unnu austurdeildina og bíða eftir sigurvegara vesturdeildarinnar í úrslitaeinvíginu. Næsti leikur Thunder og Spurs er aðfaranótt föstudags. Ef Spurs vinnur þar fer serían í oddaleik, á aðfaranótt sunnudags.