Bene­dikt og Sigur­jón leiddu Kolstad að titlinum

Kolstad hafði hafnað í 2. sæti deildarkeppninnar í Noregi, fjórum stigum á eftir meistaraliði Elverum sem féll svo hins vegar óvænt úr leik gegn Drammen í undanúrslitum úrslitakeppninnar.

Kolstad hóf úrslitaeinvígið á 34-30 sigri gegn Drammen á heimavelli og fagnaði svo afar öruggum sigri í Drammenshallen í kvöld, 39-24, eftir að hafa verið 18-11 yfir í hálfleik.

Benedikt Gunnar Óskarsson var sem fyrr áberandi í liði Kolstad en hann skoraði fjögur mörk og var með heilar sjö stoðsendingar. Aðeins Simon Jeppsson, vítaskytta Kolstad, kom að fleiri mörkum með beinum hætti en hann skoraði þrettán mörk, þar af átta úr vítum, og átti sjö stoðsendingar líkt og Benedikt.

Sigurjón Guðmundsson varði mark Kolstad að vanda og stóð sig með miklum sóma en hann varði 10 af 32 skotum, eða 31%.

Kolstad var án landsliðsmannsins og fyrirliðans Sigvalda Björns Guðjónssonar í kvöld, vegna meiðsla, en hann heldur nú í sumar til Þýskalands, til liðs við Hannover-Burgdorf.

Ísak Steinsson stóð í marki Drammen drjúgan hluta leiksins og varði 5 skot eða 22% þeirra sem hann fékk á sig.

Sigurinn er kærkominn fyrir Kolstad sem neyðst hefur til að draga saman seglin vegna langvarandi fjárhagsvandræða og mun þurfa að hefja næstu leiktíð í norsku úrvalsdeildinni með tvö mínusstig af sömu sökum.