Sjáðu al­blóðugan Kol­bein lúskra á Tékkanum

Bardagakvöldið var í beinni útsendingu á Sýn Sport í gærkvöld en þar fögnuðu báðir Íslendingarnir sem tóku þátt, Kolbeinn og Emin Kadri Eminsson, sigri.

Þungavigtarbardagi Kolbeins og Sour var sérstaklega spennandi og líflegur eins og sjá má í spilaranum hér að neðan.

Strax í fyrstu lotu opnaðist skurður við annað auga Kolbeins sem síðan stækkaði þegar á leið, með tilheyrandi blóðbaði.

Kolbeinn lét það þó ekki á sig fá og lumbraði á Sour sem sýndi hins vegar að hann gat þolað mikinn sársauka. Kolbeinn sló Tékkann ítrekað niður í fjórðu lotu en alltaf tókst honum að rísa upp aftur og halda áfram.

Það var hins vegar í fimmtu lotu sem Kolbeini tókst að yfirbuga Sour sem á endanum kastaði inn hvíta handklæðinu eftir að hafa enn einu sinni fallið niður á gólfið.

Þar með hefur Kolbeinn unnið alla tuttugu bardaga sína sem atvinnumaður og þar af fjórtán með rothöggi.