Áfram­haldandi á­tök í Líbanon þrátt fyrir sam­komu­lag

Donald Trump Bandaríkjaforseti hefur rætt bæði við fulltrúa Ísraels og Hezbollah og segir samkomulag vera til staðar um hlé á árásum en Íranir vöruðu Ísraela við því í gær að aðgerðir Ísraela í Líbanon væru ógn gagnvart vopnahléi Bandaríkjamanna og Írana.

Líbanir segja Hezbollah hafa samþykkt tillögu um að gera hlé á árásum á Ísrael en tillagan fæli sömuleiðis í sér að Ísraelar myndu ekki gera árásir á höfuðborgina Beirút. 

Forsætisráðherra Ísraela Benjamin Netanyahu staðfesti samkomulagið en sagði að árásir yrðu gerðar á Beirút hætti Hezbollah ekki árásum sínum á borgir og borgara í Ísrael og sagði að ísraelski herinn myndi halda störfum áfram í suðurhluta Líbanon.

Árásir héldu áfram

Árásir héldu engu að síður áfram í nótt. Hezbollah gerði þrjár árásir á ísraelska skriðdreka og hermenn nærri tveimur þorpum í norðurhluta Ísrael, meðal annars með drónum. Ísraelar segjast hafa stöðvar tvær langdrægar flaugar sem skotið var á loft frá Líbanon. Engar fréttir eru af mannfalli í árásunum.

Þá segja ríkismiðlar í Líbanon að Ísraelar hafi gert árásir á nokkur svæði í suðurhluta landsins og meðal annars á bæinn Debbine.

Donald Trump forseti Bandaríkjanna skrifaði á sinn eigin samskiptamiðil Truth Social að viðræður um vopnahlé við Írani héldu áfram á miklum hraða og að hann hefði rætt bæði við Netanyahu og leiðtoga Hezbollah. Bandaríkjamenn hafa reynt að skilja atburðina í Líbanon frá friðarviðræðunum en Íranir hafa lengi veitt Hezbollah aðstoð, bæði með hergögnum og fjármunum.