Enn eitt sjokkið í París: „Ég vil bara hætta í tennis núna“

Sabalenka var í öngum sínum eftir tapið og sagðist einfaldlega vilja hætta að spila tennis. Hún komst í úrslit í fyrra og vann fyrsta settið gegn Shnaider í dag 6-3 auk þess að komast í 4-1 í næsta setti. Þá fjaraði hins vegar undan og Shnaider vann 12 af síðustu 13 lotunum og leikinn þar með 3-6, 7-5, 6-0.

Sabalenka var sú eina sem eftir stóð á mótinu með reynslu af því að vinna risamót en núna er Mirra Andreeva, sem situr í 8. sæti heimslistans, sigurstranglegust.

Shnaider er aðeins í 25. sæti heimslistans og vonbrigði Sabalenka leyndu sér ekki eftir tapið:

„Engar hugsanir. Engar tilfinningar. Ég vil bara hætta í tennis núna… Við sjáum til eftir nokkra daga. Vonandi næ ég mér aftur á strik, andlega,“ sagði Sabalenka eins og sjá má hér að ofan.

Shnaider kvaðst sjálf hreinlega orðlaus eftir sigurinn. „Hún er númer eitt í heiminum svo ég var bara að reyna að gera mitt besta. Ég þurfti að berjast fyrir hverju einasta stigi,“ sagði Shnaider.

Hún mætir hinni pólsku Maju Chwalinska í undanúrslitum á morgun en Andreeva mætir Mörtu Kostyuk frá Úkraínu.