„Ég var lé­legur í kvöld, þetta er ekki flóknara en það“

Heimamenn í Spurs leiddu með fjórtán stigum í þriðja leikhluta, 65-51, en gestirnir frá New York sneru leiknum við og unnu síðustu átján mínútur leiksins, 54-30.

Jalen Brunson skoraði 30 stig fyrir New York, Karl-Anthony Towns lauk leik með 18 stig og 12 fráköst en OG Anunoby skoraði 17 stig.

Knicks-liðið hefur nú unnið tólf leiki í röð í úrslitakeppninni og jafnað þar með næstlengstu sigurgöngu í einni úrslitakeppni í sögu NBA. Spurs vann tólf leiki í röð árið 1999 og Warriors vann fyrstu fimmtán leiki sína í úrslitakeppninni árið 2017, en bæði lið urðu meistarar þau ár.

„Ég held að við vitum hvað við þurfum að gera. Ég held að við séum nokkuð samheldinn hópur,“ sagði Brunson.

Brunson skoraði þrettán stig í fjórða leikhluta, aðeins sex færri en San Antonio náði að skora sem lið í þeim leikhluta, og innsiglaði sigurinn með snúningsskoti um leið og hann féll í gólfið þegar 38 sekúndur voru eftir.

„Hann er algjör keppnismaður,“ sagði Mike Brown, þjálfari Knicks. „Á stærstu stundunum stígur hann fram. Það er það sem verðmætustu leikmenn eiga að gera.“

Knicks, sem lauk leiknum á 11-0 áhlaupi, skráði sig enn frekar á spjöld sögunnar. Þeir urðu fyrsta liðið til að sigra San Antonio í fyrsta leik lokaúrslitanna – Spurs hafði unnið alla sex slíka leiki áður. Þetta er líka í fyrsta sinn sem Spurs lendir undir í lokaúrslitum.

Victor Wembanyama var með 26 stig og 12 fráköst fyrir Spurs en hann hitti aðeins úr 6 af 21 skoti sínu í sínum fyrsta leik í lokaúrslitum. Stephon Castle skoraði 17 stig og þeir Julian Champagnie og Dylan Harper skoruðu 16 stig hvor fyrir Spurs.

„Ég var lélegur í kvöld, þetta er ekki flóknara en það,“ sagði Wembanyama.

Leikur 2 fer fram á föstudag í San Antonio.