Ekkert teiti því Trump mætir á völlinn

NY Knicks leiðir úrslitaeinvígið 2-0 gegn San Antonio Spurs eftir tvo magnaða sigra í San Antonio. Knicks getur því klárað dæmið með sigrum í næstu tveimur heimaleikjum.

Það er algert körfuboltafár í New York vegna Knicks og áhorfspartý út um alla borg. Þar á meðal fyrir utan heimavöll liðsins en það verður ekki í boði í nótt.

Þar sem Trump er að mæta er öryggisgæsla meiri en gengur og gerist. Það hefur því verið ákveðið að banna stuðningsmönnum að fjölmenna fyrir framan MSG og vera með læti.

Götum í kringum völlinn verður lokað og búast má við því að laganna verðir muni standa í ströngu.

Ekki er búist við því að Trump mæti á leik fjögur og þá verður aftur hægt að horfa á leikinn fyrir utan MSG.