Styðja við bakið á Ingvari í hans bar­áttu: „Alltaf að fara gera þetta“

„Gríðar­lega sáttur,“ segir Kári í sam­tali við íþrótta­deild Sýnar inntur eftir viðbrögðum við því að vera búinn að kló­festa mark­vörð í reynsluboltanum Ögmundi Kristinssyni sem gengur til liðs við Víking frá Val. 

„Mikilvægt að maðurinn hafi staðið á stóra sviðinu. Við getum treyst honum í þau stóru verk­efni sem eru fram­undan. Bæði heima fyrir og í Evrópu. Við treystum líka Aroni en ef eitt­hvað kemur fyrir Aron þá værum við í vanda staddir. Þetta er mjög flott fyrir sam­keppnina í hópnum.“

At­burðarásin verið hröð eftir að Ingvar Jóns­son, sem varið hefur mark Víkinga á glæstum tímum, greindist með ill­kynja krabba­mein. Víkingar fengu undanþágu frá KSÍ til þess að sækja annan mark­vörð þar sem að Uggi Jóhann Auðuns­son, annar mark­vörður hjá Víkingum, er einnig frá og að glíma við brjósk­los í baki.

„Sam­kvæmt reglu­gerðinni átti þetta að fljúga í gegn en tók svolítinn tíma. Þetta var mjög form­legt ferli en hafðist á endanum. Ég átti gott spjall við Ög­mund. Þekki hann vel frá okkar tímum í lands­liðinu saman. Ég treysti honum full­kom­lega. Hann mér að hann væri klár í verk­efnið og það væri ekkert að trufla hann líkam­lega. Svo fór hann í gegnum sjúkra­skoðun, flaug í gegnum það. Hann mun koma sterkur inn í þetta hjá okkur.“

Kári býst við hungruðum Ög­mundi í markinu hjá Víkingum en kappinn hefur mátt sæta sig við lítinn sem engan spilatíma hjá Val þar sem að hann fékk að vita það fyrir tíma­bilið að hans krafta væri ekki lengur óskað á Hlíðar­enda.

„Oft þegar að menn fá svona í and­litið þá koma þeir tvíefldir til baka. Ég hef engar áhyggjur af því að það verði ekki líka staðan hjá honum.“

Styðja þétt við bakið á Ingvari

Ingvar Jóns­son háir nú sína baráttu utan vallar við meinið og Víkingar styðja við hann af fullum krafti. Samningur Ingvars við Víkinga var fram­lengdur í gær. Það koma aldrei neitt annað til greina hjá Víkingum en að styðja með þessum hætti við bakið á sínum manni.

„Við vorum alltaf að fara gera þetta. Ingvar er búinn að vera fyrsti maður á blað hjá okkur í háa herrans tíð. Gríðar­lega stór partur af vel­gengni félagsins frá því að hún byrjaði. Hefur bjargað okkur trekk í trekk, er æðis­legur liðs­maður, félagi og vinur allra í félaginu. Kom aldrei neitt annað til greina.“

Kári er stoltur af því hvernig leik­menn, þjálfarar og stuðnings­menn Víkings Reykja­víkur hafa þjappað sér saman í kjölfar áfallsins sem fréttirnar af Ingvari voru.

„Maður sér það á leik liðsins að þeir eru byrjaðir að spila fyrir ein­hvern annan en sjálfan sig. Oft setur svona at­riði hlutina í stærra sam­hengi. Líka bara hvernig ís­lenska fót­bolta­sam­félagið hefur þjappað sér saman, allir að leggja sitt af mörkum.“