Féll á lyfja­prófi við að reyna að verða ó­létt

AIU tilkynnti á föstudag að prófið hefði greint umbrotsefni Letrozole, sem er fyrst og fremst notað við meðferð á brjóstakrabbameini en getur einnig verið notað til að hindra estrógen og vinna gegn aukaverkunum vefaukandi stera. Letrozole er einnig frjósemislyf sem getur örvað egglos með því að lækka estrógenmagn tímabundið.

Hin 29 ára gamla Tsegay hefur tvisvar orðið heimsmeistari og er einnig Ólympíuverðlaunahafi frá leikunum í Tókýó 2021.

Millivegalengdarhlauparanum frá Eþíópíu var sjálfri tilkynnt um jákvæða sýnið 26. janúar á þessu ári og lagði hún strax daginn eftir fram læknisfræðileg gögn og skýringar þar sem hún útskýrði hvers vegna Letrozole og umbrotsefni þess hefðu getað valdið jákvæðri niðurstöðu úr sýni hennar.

Hún útskýrði síðar í yfirlýsingu á föstudag, í kjölfar skýrslu AIU, að hún hefði staðfest að hún væri þunguð og hefði tekið Letrozole samkvæmt lyfseðli frá lækni.

„Ég tók Letrozole til að auka frjósemi mína, eins og læknirinn minn ávísaði,“ sagði Tsegay. „Sem stendur gengur meðgangan fullkomlega og ég vonast til að snúa aftur til íþrótta um leið og barnið mitt er fætt. Takk, allir aðdáendur, fyrir ást ykkar, ég sakna ykkar allra. Ég kann einnig að meta skilning og stuðning AIU.“

Þar sem hún sótti ekki um undanþágu fyrirfram var beiðni hennar um að fá lyfið samþykkt eftir á hafnað. Þess vegna er hinni 29 ára gömlu íþróttakonu refsað fyrir brot á reglum. Refsingin er þó stutt vegna þess að hún játaði brot á reglugerðinni og hefði hvort eð er fengið leyfi til að nota lyfið ef hún hefði aðeins sótt um í tæka tíð.

Keppnisbann hennar hófst 1. júní, þann dag sem hún samþykkti sáttina, og lýkur 30. september.

Tsegay er heimsmethafi innanhúss í 1500 metra hlaupi og átti áður heimsmetið í 5000 metra hlaupi.

Tsegay er heimsmeistari 2022 í 5000 metra hlaupi og heimsmeistari 2023 í 10.000 metra hlaupi. Hún hlaut bronsverðlaun í 1500 metra hlaupi á heimsmeistaramótinu 2019, silfurverðlaun á heimsmeistaramótinu 2022 og bronsverðlaun á Ólympíuleikunum í Tókýó 2020 í 5000 metra hlaupi.

Hún hefur tvívegis unnið til verðlauna í 1500 metra hlaupi á heimsmeistaramótinu innanhúss, hlaut brons árið 2016 og gull árið 2022.