Systurnar spila saman á Wimbledon-mótinu

Systurnar fengu sérstakt boðsæti (e. wildcard) en hvorug þeirra er skráð til keppni í einliðaleik. Þar er þó enn eitt sæti opið, segir í frétt BBC.

Serena er orðin 44 ára gömul en hún sneri aftur til keppni á Queen‘s Club-mótinu í London fyrir skömmu og fagnaði þar sigri í tvíliðaleik með kanadíska táningnum Victoriu Mboko. Hún spilar svo með Karolinu Muchova í Berlín í þessari viku.

Serena hafði þar til í þessum mánuði ekki spilað á móti í fjögur ár en sýndi í London að hún er enn í fantaformi. Þessi mikla tennisgoðsögn hefur unnið 23 risatitla í einliðaleik á ferlinum, þar af 7 sinnum á Wimbledon, og 14 í tvíliðaleik.

Venus, sem er 45 ára, hefur unnið Wimbledon-mótið fimm sinnum í einliðaleik en tapað öllum sjö leikjum sínum í einliðaleik á þessu ári.

Auk afreka sinna í einliðaleik hafa systurnar unnið saman í tvíliðaleik alls 14 risamótstitla, síðast á Wimbledon árið 2016 þegar þær unnu tvíliðaleik mótsins í sjötta sinn.