Þrátt fyrir að innlendar hlutabréfavísitölur hafi hækkað nokkuð í liðnum mánuði þá héldu fjárfesta áfram að losa um stöður sínar í hlutabréfasjóðum fyrir marga milljarða. Þá var jafnframt talsvert útflæði úr skuldabréfasjóðum annan mánuðinn í röð.
Innlausnir í hlutabréfasjóðum í maí námu ríflega 3,8 milljörðum króna, en á sama tíma var sala á nýjum hlutdeildarskírteinum aðeins um 560 milljónir. Hreint útflæði úr sjóðunum í síðasta mánuði reyndist vera samtals tæplega 3,3 milljarðar króna, samkvæmt nýjum tölum frá Seðlabankanum. Þetta er mesta útflæði úr hlutabréfasjóðum sem sést hefur í einum mánuði frá því um mitt árið 2018.
Á fyrstu fimm mánuðum ársins hafa fjárfestar minnkað hreina stöðu sína í hlutabréfasjóðum um nærri 6,4 milljarða, borið saman við hrein kaup upp á ríflega 600 milljónir króna á sama tíma fyrir ári.
Hlutabréfasjóðir og blandaðir sjóðir, sem fjárfesta bæði í skuldabréfum og hlutabréfum, hafa átt undir högg að sækja í nærri fjögur ár samhliða útflæði og verðlækkunum helstu hlutabréfavísitalna. Í maí var sem fyrr nánast engin sala á nýjum hlutdeildarskírteinum í blandaða sjóði – hún nam 67 milljónum króna – og hreint útflæði var samtals ríflega 500 milljónir.
Heildareignir innlendra hlutabréfasjóða eru núna um 147 milljarðar á meðan blandaðir sjóðir eru um 67 milljarðar að stærð. Hið mikla útflæði sem var út úr hlutabréfasjóðum í maí kom á sama tíma og gengi hlutabréfa hækkaði nokkuð, en bæði Úrvalsvísitalan og Heildarvísitalan var upp um meira en þrjú prósent í liðnum mánuði. Vísitölurnar féllu síðan skarpt í upphafi júní þegar líftæknifélagið Oculis varð fyrir þungu höggi þegar eitt af þremur þróunarlyfjum þess mistókst að ná aðalmarkmiðum sínum úr tveimur fasa 3 rannsóknum.
Ásamt gengislækkunum sumra félaga frá áramótum, einkum vaxtarfélaganna þriggja, hefur verið tugprósenta samdráttur í veltu á hlutabréfamarkaði á milli ára – og þar spilar inni í meðal annars minnkandi umsvif og fjárfestingargeta hlutabréfasjóða. Leiðrétt fyrir arðgreiðslum er Úrvalsvísitalan niður um ríflega sex prósent á árinu.
Á þessu ári hefur verðbólgan, sem mælist núna 5,2 prósent, reynst þrálátari en væntingar höfðu verið um og samhliða því hafa vextir farið hækkandi. Á síðasta fundi peningastefnunefndar 20. maí síðastliðinn voru vextir hækkaðir um 25 punkta – úr 7,25 í 7,5 prósent – og útlit fyrir að þeir hækki á nýjan leik í ágúst.
Eftir nánast stöðugt innflæði í skuldabréfasjóði frá því á haustmánuðum síðasta árs hefur sú þróun stöðvast í bili. Annan mánuðinn í röð voru fjárfestar að minnka stöður sínar í þess konar sjóðum og var hreint útflæði núna upp á nærri sjö milljarða. Slíkt útflæði úr skuldabréfasjóðum hefur ekki sést í tvö ár.
Á þessu ári eru það verðtryggð ríkisskuldabréf sem hafa gefið bestu ávöxtunina en vísitala þeirra skuldabréfa er upp um ríflega fjögur prósent frá áramótum. Á sama tíma hefur vísitala óverðtryggðra skuldabréfa hækkað um liðlega 1,5 prósent.
