Fleiri augu á mér í þessari deild

Stefán Árni Pálsson skrifar 1. júlí 2026 17:32

Kristinn Pálsson á landsliðsæfingu í Ásgarði í vikunni.

„Þetta er bara eitthvað sem kom frá umboðsmanninum. Auðvitað þekki ég svæðið og hef komið þarna en þú veist, þetta er bara körfuboltaleg ákvörðun og síðan náttúrulega hjálpar til að það sé beint flug og maður er náttúrulega með fjölskyldu og það er þægilegt að fara fram og til baka. En þetta er hörkudeild,“ segir Kristinn Pálsson á landsliðsæfingu í vikunni.

Ísland undirbýr sig núna fyrir landsleiki gegn Ítölum annað kvöld og Bretum úti 5. júlí. Kristinn samdi á dögunum við Alicante í spænsku B-deildinni eftir að hafa leikið á Ítalíu.

„Þetta er klárlega svona skref fram á við og líka fleiri augu á þessari deild heldur en deildinni sem ég var í og þetta gæti opnað margar dyr fyrir mig, kannski upp á framhaldið,“ segir Kristinn.

Landsliðsfyrirliðinn Ægir Þór Steinarsson lék sjálfur með Alicante og ræddi Kristinn við hann áður en hann samdi við félagið.

Ætla vinna þá aftur

„Ég heyrði í honum um leið og ég fékk tilboðið og spjallaði við hann heillengi um þetta og hann var náttúrulega þarna með fjölskyldu líka. Það hjálpaði mér kannski að taka ákvörðun líka um þetta.“

Það er ekki langt síðan að íslenska landsliðið vann það ítalska ytra.

„Ég var meiddur í fyrri leiknum við Ítalíu en fékk að vera með strákunum í kringum leikinn. Það er sturlað að vinna svona stórar þjóðir í körfuboltaheiminum, á útivelli, og við erum búnir að gera það núna tvisvar gegn Ítalíu. Núna er kominn tími til að gera það á heimavelli líka.“

Hann segir að Ítalarnir hafi fengið mikið sjokk eftir tapið.

„Menn höfðu enga trú á okkur og þannig er þessi heimur bara – við erum alltaf lítilmagninn (e. underdogs), sama á móti hverjum við erum að spila. Við þurfum bara að gera það að okkar einkenni, eins og við höfum gert. Þegar ég kom inn í klefann hjá mínu félagsliði eftir þetta voru allir bara í sjokki, ánægðir fyrir okkar hönd en pirraðir út í sitt landslið.“

Kristinn er í dag orðinn mjög reyndur landsliðsmaður. vísir/Anton

Ítalir eru nú þegar komnir upp úr riðlinum en liðin taka stigin með sér svo allir leikir skipta máli.

„Síðan er þetta líka upp á stoltið hjá þeim. Að tapa tvisvar fyrir Íslandi er ekki gott fyrir svona stóra körfuboltaþjóð. En við mætum bara til að vinna, hvort sem þeir eru klárir eða ekki. Við hugsum bara um alla þessa litlu punkta sem þarf að hafa í huga til að vinna þessar stóru þjóðir. Við vorum gríðarlega nálægt þessu síðast og aftur núna. Við gætum komið okkur í frábæra stöðu til að fara með heilmörg stig inn í milliriðilinn en við þurfum að byrja á þessu verkefni gegn Ítalíu og klára það sem við þurfum að klára.“

Hér að neðan má sjá viðtalið í heild sinni en þar ræðir Kristinn einnig um leikinn við Ítali annað kvöld.

Klippa: Landsliðsfyrirliðinn hjálpaði með ákvörðunina

Landslið karla í körfubolta