Tví­liða­leikur Williams-systra gæti verið í upp­námi

Serena Williams er 44 ára en ákvað að taka þátt á Wimbledon-risamótinu í ár eftir að hafa lagt spaðann á hilluna fyrir fjórum árum. Hún tapaði fyrsta leik sínum í einliðaleik en þar mætti hún Ástralanum Maya Joint sem spilaði vel.

Þrátt fyrir að hafa ekki unnið fyrsta leikinn í einliðaleik sýndi Williams mikið hugrekki og spilaði frábærlega á köflum. Aldurinn var greinilega farinn að segja til sín og var erfitt fyrir Williams að halda í við tvítuga mótherjann sinn.

Auk þess að spila í einliðaleik ætlaði hún líka að spila í tvíliðaleik með systur sinni Venus Williams. Þær eru tvær af sigursælustu tennisleikmönnum allra tíma og eru eitt sterkasta tvíliðaleikspar fyrr og síðar. Saman unnu þær fjórtán risamót saman og þrjú gull á Ólympíuleikunum. Þær eiga líka eitt gull í einliðaleik á Ólympíuleikunum hvor.

Serena fann fyrir meiðslum í hnénu strax í fyrsta setti leiksins í gær en harkaði af sér og kláraði leikinn. Hún tapaði fyrsta settinu en náði að vinna annað í upphækkun. Í þriðja settinu var hún áberandi þreytt og endaði Maya Joint á að vinna það örugglega.

Eftir leikinn byrjaði hnéð á Serenu strax að bólgna upp og fékk hún leyfi frá læknum Wimbledon-risamótsins til að sleppa við að taka viðtöl eftir leikinn. Læknar buðu henni einnig hækjur til að ganga á en hún afþakkaði boðið.

Serena er ekki búin að greina frá því hvort hún verði klár fyrir tvíliðaleikinn sem á að vera spilaður á föstudaginn en það verður sögulegt að systurnar tvær stígi aftur á tennisvöllinn. Það er eitthvað sem enginn tennisáhugamaður á að láta fram hjá sér fara.