Már getur andað aftur: „Ég bara man eigin­lega ekki eftir þessari til­finningu“

„Þó að ég eigi enn eftir að jafna mig á bólgum og svoleiðis eftir aðgerðina þá á ég mun auðveldara með öndun. Ég held að þetta muni létta mér lífið verulega. Þarf bara að passa að reka nebbann ekki á vegg í framtíðinni,“ segir á samfélagmiðlum Más og þar sést hann líka í mynd og ræða þessar góðu fréttir.

Már hafði sett inn stutt myndband strax eftir aðgerðina en núna var ástæða til að segja betur frá gangi mála.

„Þá er Már búinn í nefaðgerð og ég var að koma frá lækninum. Hann fjarlægði rörin sem voru sett hérna inn í andlitið á mér í síðustu viku. Þessi rör voru ekkert smá, því þau voru alveg held ég um átta sentímetra löng,“ sagði Már.

„Þannig að það er mikill léttir að vera búinn með þetta. Ég get andað með nefinu og þetta er ótrúleg tilfinning. Ég bara man eiginlega ekki eftir þessari tilfinningu,“ sagði Már og fagnaði með því að draga íslenska fánann að húni.

Fyrir tíu árum lenti Már í því óhappi þegar hann var að æfa flugsundsspretti með froskalöppum og lenti beint á bakkanum með andlitið. Síðan þá hafði hann ekki getað andað almennilega með nefinu og hafði áður farið í aðgerð sem tókst ekki.

Nú virðist þetta hafa gengið miklu betur og þetta ætti að vera allt annað líf fyrir þennan frábæra sundmann.