Opna fyrir um­ferð á morgun

Brúin fer á milli Jaðarsels og Vatnsendahvarfs og verður lokað fyrir umferð á Breiðholtsbraut frá klukkan ellefu í kvöld til sex í fyrramálið. Opnað verður síðan fyrir umferð yfir nýju brúna að morgni föstudags.

Á sama tíma verða ný umferðarljós við gatnamót Arnarnesvegar og Breiðholtsbrautar tekin í notkun en gatnamótum Vatnsendahvarfs og Breiðholtsbrautar lokað. Umferðarljósin þar verða fjarlægð og skipulagi gatnamótanna breytt. 

„Áætlað er að þau verði opnuð í breyttri mynd síðla hausts. Ökumönnum er bent á að aka til og frá Vatnsendahvarfi í gegnum Vatnsendaveg, nýtt hringtorg við Arnarnesveg og ný gatnamót á Breiðholtsbraut,“ segir í tilkynningu á vef Vegagerðarinnar.