Miklir skógar­eldar nærri París

Yfirvöld í Frakklandi segja eldinn hafa breiðst hratt út og nái þegar yfir átta hundruð hektara svæði. Auk tveggja slökkviflugvéla hafi tvær þyrlur og könnunarflugvél verið sendar á vettvang. 

Le Monde og AFP segja hinn víðfeðma Fontainebleau-skóg vera þéttsetinn þorpum. Fimmtán heimili í þorpinu Vaudoue hafi verið rýmd í gær en eldurinn sé „illvígur“ og af „fordæmalausri stærðargráðu.“ 

Rýma hefði þurft fleiri þorp hefðu slökkviflugvélarnar ekki verið sendar á svæðið er haft eftir aðgerðarstjóra slökkvistarfsins. Þetta sé í fyrsta sinn sem slíkar vélar hafi verið sendar á Parísarsvæðið en þær sinni yfirleitt slökkvistörfum í suðurhluta landsins, þar sem loftslag er að jafnan þurrara og hlýrra, segir talsmaður landssambands slökkviliðsmanna í Frakklandi. 

Einni stærstu hraðbraut Frakklands hafi verið lokað frá norðri til suðurs í gær og mikil truflun hafi orðið umferð og samgöngum. Miklar seinkanir urðu á lestum til og frá Gare de Lyon- lestarstöðinni í París.

Stórir hlutar Frakklands, þar á meðal höfuðborgin París, glími nú við þriðju hitabylgjuna síðan í maí, sem stórauki hættuna á eldsvoðum.