Landsliðsmiðverðirnir skiptu báðir um lið í dag

Hörður Björgvin færir sig til í Grikklandi en hann fer frá Levadiakos til Atromitos. Hörður var að renna út á samningi og gerir tveggja ára samning við Atromitos.

Hinn 33 ára gamli Hörður hefur spilað 54 landsleiki á ferlinum en hann hefur spilað á Ítalíu, í Englandi, í Rússlandi og nú síðast í Grikklandi þar sem hann er að fara í sitt þriðja lið.

Hjörtur Hermannsson er aftur á móti að yfirgefa Grikkland en hann fer frá gríska félaginu Volos til sænska félagsins IFK Gautaborg.

Hjörtur er 31 árs gamall og er nú að koma til Gautaborgar í annað sinn á ferlinum eftir að hafa leikið þar á láni frá PSV Eindhoven fyrir áratugi.

Hjörtur, sem er uppalinn hjá Fylki, hefur einnig leikið fyrir danska félagið Bröndby og ítölsku félögin Pisa og Carrarese á ferlinum.

Hjörtur fær íslenskan liðsfélaga því Kolbeinn Þórðarson hefur verið lykilmaður hjá Gautaborgarliðinu undanfarin ár.