Ís­lenska víkingaklappið lifir: FH-strákarnir unnu Gothia Cup

FH vann spænska liðið Imperial Future í úrslitaleik stráka fjórtán ára og yngri.

Víkingur Hrafn Þórhallsson skoraði eina markið á 47. mínútu en hann var langmarkahæstur hjá FH-liðinu með átján mörk í aðeins tíu leikjum.

FH-ingar voru taplausir á mótinu, unnu níu leiki, gerðu eitt jafntefli og skoruðu 53 mörk gegn aðeins tveimur. Þeir unnu þýska liðið SG Borken e.V. 4-0 í undanúrslitaleiknum þar sem Víkingur Hrafn var með þrennu og Magnús Páll Eyjólfsson skoraði eitt mark.

Fyrirliðinn Jón Mikael Gestsson var næstmarkahæstur hjá FH á mótinu með níu mörk af miðjunni og Fannar Helgi Kristinsson skoraði sex mörk. Lárus Flóki Björnsson skoraði fimm mörk, Guðmundur Árni Guðrúnarson var með fjögur mörk og Breki Fjalar Valdimarsson skoraði þrjú.

Eftir leikinn sýndu FH-strákarnir að íslenska víkingaklappið lifir enn góðu lífi þrátt fyrir að norski víkingaróðurinn hafi stolið senunni á þessu HM-sumri.

Jón Mikael mætti með trommu út á gras og stjórnaði víkingaklappinu með liðsfélögum sínum og stuðningsfólkinu í stúkunni.

Arnar Sigþórsson er þjálfari liðsins og er greinilega að gera frábæra hluti með framtíðarleikmenn FH-inga.