Bergrós meðal fimm­tán efstu eftir fyrsta daginn

Hin nítján ára gamla Bergrós er í fimmtánda sæti eftir dag eitt með 245 stig en hún er aðeins tveimur stigum á eftir næstu konu og 35 stigum frá topp tíu.

Bergrós náði níunda sæti í fyrstu grein og áttunda sæti í þriðju grein sem var hnébeygja. Hún var síðan á topp tuttugu í síðustu þremur greinum dagsins, þar á meðal í þrettánda sæti í síðustu greininni sem var sundgrein.

Bretinn Aimee Cringle er með forystu, hefur náð í 458 stig og er 38 stigum á undan löndu sinni Lucy Campell. Ástralinn Mardeline Sturt er þriðja með 407 stig eða 51 stigi frá toppsætinu. Haley Adams er efst bandarísku kvennanna með 372 og fimmta er hin kanadíska Emma Lawson með 364 stig.

Bandaríkjamaðurinn James Sprague er efstur í karlaflokki en þó bara með einu stigi meira en landi hans Dallin Peper. Justin Medeiros, enn einn Bandaríkjamaðurinn, er þriðji, 21 stigi á eftir þeim. Ástralinn Jay Crouch er fjórði og landi hans Ricky Garard er fimmti. Efsti Evrópumaðurinn er Þjóðverjinn Moritz Fiebig í sjötta sæti.

Eftir þennan mjög svo krefjandi dag fá keppendur einn heilan dag til að jafna sig en næsta grein er ekki fyrr en á föstudaginn.

Hér fyrir neðan má horfa aftur á fyrsta keppnisdaginn..